Condes de Albarei presenta a súa nova imaxe corporativa

Nun mundo en constante cambio, permanecer inmóbil non é unha opción. En Condes de Albarei sabemos que volverse a inventar, adaptarse ás novas realidades e camiñar mirando cara ó futuro, pero sen esquecer o pasado, é algo fundamental. 

Por iso, despois de moito traballo, esforzo, tempo e dedicación querémosvos amosar o último froito dun proxecto que comezou no ano 1988 e que hoxe está máis vivo que nunca.

O ano 2021 quedará sinalado no noso calendario para sempre, marcando un antes e un despois na Adega Condes de Albarei. 

A nosa adega estrea unha nova imaxe corporativa, deixando atrás o seu emblemático logo e apostando pola renovación, a modernidade e a frescura.

Unha nova identidade que mira cara ó futuro, sen deixar de lado todo aquilo que nos converteu no que somos. A nosa tradición e valores, elementos esenciais da nosa adega, mantéñense íntegros co paso do tempo.

Se queres saber máis sobre a nova identidade corporativa de Condes de Albarei, convidámoste a que sigas a ler este post. 

Esa cor tan nosa

Hai unha cor única e singular que nos acompaña cada día nos nosos viñedos. Unha cor que temos a fortuna de gozar cada vez que alzamos a mirada cara á ría de Arousa, o mesmo que marcou a imaxe da nosa adega dende aquela primeira colleita do ano 1988.

Falamos da color verde, a que queda agora reflectida no noso novo logo e etiqueta, e que significa tradición, orixe e singularidade. Por outra parte, aparece a cor dourada para transmitir toda a calidade e prestixio da uva albariño.

Elementos que nos unen

Por suposto, non son só as cores as que nos falan de Condes de Albarei nesta nova etiqueta. Cada elemento, cada forma, ten o seu propio significado.

O círculo simboliza o ingrediente principal e a nosa razón de ser: a uva albariño. Ademais, xera un vencello coa nosa adega Pazo Baión, dado que esta uva é o último elemento do seu logo.

Pero non só iso, senón que tamén é un símbolo da unión de tódolos viticultores que compoñen Condes de Albarei e un xeito sinxelo de transmitir, a través dunha circunferencia, o equilibrio perfecto dos nosos albariños.

As ondas evocan a nosa ría e o océano, dous elementos chave que modulan a nosa contorna, aportándolle á nosa uva esa nota típica e singularidade única da nosa zona.

Albarei é Salnés, Salnés é Galicia

Por último, pero non por elo menos importante, hai  palabras moi importantes neste novo deseño.

As palabras “Salnés” e “Galicia” acompañan ó logotipo da nosa adega, axudando a que a xente a sitúe no mapa.

En definitiva, con esta nova imaxe buscamos transmitir unha perfecta comuñón entre tódolos elementos que conforman Condes de Albarei. E, con sorte, logrará xerar en vosoutros a mesma emoción que sentimos ó abrir unha das nosas botellas.  

Porque cando a emoción nos alcanza, é tanto o que necesitamos compartir, que as palabras non chegan.